Aktuelles PDF
Aktuelle Ausgabe als PDF
Inserat aufgeben

Um was geits?

Logisch, um d Stärnematt. U zwar bärndütsch, ungschminkt u politisch unkorräkt. Äs wird emotionau u faktebasierti Argumänt rücke i Hingergrund. Wie ig scho im ne Läserbrief gschribe ha: Itz setze mi äuä grad tou i d Nessle. Aber mir wüsse aui, das Brönne geit wieder verby.

Äs isch mir bewusst, dass drei Tag vor der Abstimmig d Meinige so ziemlech gmacht si u viu Cuver scho uf der Gmeindsverwautig liege. U de glych. Was dänke äch d Gägner vo dere Umzohnig, uf weuer Basis ds Parlamänt dä eischtimmig Entscheid troffe het? Jede einzeln het sech a Sitzige, Diskussione, Informationsaläss u i Arbeitsgruppe si Meinig biudet. Jede het abgwoge, was für d Gmein müglech isch, wo dass d Vor- u Nachteile si. Kei einzige Parlamentarier zieht us sim Entscheid ä pärsönleche oder finanzielle Nutze. Bis uf par wenigi Parlamentarier stöh no aui hinger dere Umzohnig. Einzig eis oder zwöi Mitglieder, wo notabene ihri Hang o hei dobe gha, hei par Tag später für ds Gägekomitee Ungerschrifte gsammlet. Da chume ig nid ganz nache. Auso, das heisst eigentlech scho. Wenn me luegt, dass einigi Mitglieder vom Gägnerkomitee Bewohner, Zeichnigsberächteti oder süsch verbundeni Pärsone vo der benachbarschaftleche Wohnbougnosseschaft HAWO si, so chönnt me doch liecht uf ketzerischi Gedanke cho. Ä lang anduhrendi, stoubigi Bousteu ir diräkte Nachbarschaft mit au däm Lärm u Verchehr isch würklech nid luschtig. U plötzlech hets de no nöij Nachbare … Ein Schelm, wer Böses denkt. Der mündig Bürger zieht siner eigete Schlüss us mine uflätige Bemerkige.

Vilech glych no äs par Fakte. 

Finanze:
1) Für d Anzauh Stüürzahler chönne ds haute oder ganz liecht ds erhöche, brucht d Gmeind Worb zuesätzleche Wohnruum. Der Bedarf a Wohnflächi pro Chopf nimmt stehtig zue. Öb schön oder nid, äs isch ä Tatsach.
2) Für üsi Gmeindsinfrastruktur chönne ds zahle isch ä gwüssi Wohnboutätigkeit nötig. Uf privati oder institutionelli Liegeschaftsbsitzer het d Gmein kei Yfluss, was ä Us- oder Ahbou vo ihrne Liegeschafte in Bezug uf inneri Verdichtig betrifft.
3) D Wärtabschöpfig bire Umzohnig vor Stärnematt wär ä wiukommene Zuestupf i d Gmeindsfinanze. Ä drohendi Stüürerhöchig wär de nid nume uf d WOBO-Sanierig zrügg ds füehre, sondern ou uf verhinderete Wohnigsbou.

Umwäut, Klima, Lag:
Äs isch sicher nid die chlyni Überbouig, wo ds Klima in Worb exorbitant wird verändere. Wenn me der Ortsplan aluegt, isch es nume d Schliessig vore Lücke. U aus Familie- u Freizytzäntrum für d Bevöukerig isch das Areau doch sehr arg am Dorfrand.

So, itz hani sicher viu Lüt unnötig tschaupet u vore Chopf gstosse. Wiu, d Meinige si ja gmacht u das viele Gäud für d Kampagne isch usgäh.
Mi Wunsch wär, dass d Gägner nid no müesse Gäud füre näh für Champagner a der Siegesfyr vo der Abstimmig.
Gäge ängstirnigs Dörflidänke: Ja zur Umzohnig Stärnematt

Ernst Bützberger,
Mitglied GGR

Beitrag teilen:

Aktuelle Beiträge

Sportzentrum Worb AG: Durchzogene Bilanz

•
Politik, Wirtschaft

Der Verwaltungsrat der Sportzentrum Worb AG blickt auf ein durchzogenes Betriebsjahr 2024. Mit dem nasskalten Wetter in Mai und Juni ist der Saisonstart in der Badi sprichwörtlich ins Wasser gefallen. Wegen den wiederholten politischen Angriffe in den letzten Jahren wird der Verwaltungsrat geschlossen zurücktreten.

Weiterlesen »
Worber Gwärb: 160 Jahre Gewerbeverein

Worber Gwärb: 160 Jahre Gewerbeverein

•
Wirtschaft

Seit 1865 prägt der Worber Gewerbeverein die Gemeinde nachhaltig und hat schon in seinen Anfängen für Innovationen gesorgt. Auch heute setzt sich der Verein für die Sichtbarkeit des Gewerbes in Politik und Bevölkerung ein. Das Jubiläumsfest für die Vereinsmitglieder findet am 20. Juni im Festzelt bei den Sportanlagen Worbboden statt, das anlässlich des Schülerturniers errichtet wird.

Weiterlesen »

Areal ehemalige Chäsi Worb: Wohnungen und Markthalle

•
Wirtschaft

Im Anzeiger Konolfingen wurde das Baugesuch der CoOpera Sammelstiftung PUK aus Bern publiziert, nach dem an der Richigenstrasse 2 in Worb ein Neubau für Gewerbe und Wohnen entstehen soll. Die ehemalige Chäsi, die auf dem betreffenden Grundstück stand, ist im vergangenen Jahr abgerissen worden.

Weiterlesen »